Karim Benzema ka peshuar në diskutimin e vazhdueshëm të Real Madridit për rolin e sulmuesit të krahut të majtë, ku Vinicius Junior dhe Kylian Mbappe po luajnë të dy, por ish-ylli i Los Blancos tregoi se kush duhet të luajë atë pozitë.

Sulmuesi francez shprehu besimin se roli i Vinicius është i sigurt për shkak të performancës së tij të jashtëzakonshme, teksa kur u pyet për Mbappen, Benzema ishte i qartë për pozicionin e tij.

“Nuk mendoj se Vinicius do të lëvizë nga e majta. Ai është më i miri në botë për momentin”, ka thënë fillimisht Benzema.

“Mbappe duhet ta kuptojë se tani është 9-sh dhe të harrojë krahun e majtë. Ata e kanë sjellë vetëm për të shënuar gola”.

Deklaratat e Benzemas erdhën si përgjigje ndaj disa thirrjeve që Mbappe të kthehet në pozicionin e tij të preferuar për të rifituar formën e tij më të mirë.

Benzema foli edhe për presionin intensiv me të cilin përballet Mbappe që nga kalimi në Real Madrid , duke nënvizuar se si kërkesat e Real Madridit ndryshojnë nga klubet e tjera.

“Mbappe e di se ka shumë presion në Real Madrid. Në Madrid, nëse kaloni dy ose tre ndeshje pa gola, ata do t’ju vrasin”.

“Mund ta fitoni Topin e Artë, por nëse nuk shënoni në tre ndeshje pas tij, është e njëjta gjë”, përfundoi ylli francez.

Komentet e tij pasqyrojnë pritshmëritë e larta që lojtarët kanë në Real Madrid, ku pritet qëndrueshmëri nga çdo yll, pavarësisht arritjeve të kaluara. /Telegrafi/